Legendha Watu Prau

Legendha Watu Prau

Gunung Gajah Bayat

Dhek jaman biyen ing Gunung Gajah, Bayat, ana perkampungan kang sinebut Kampung Jetis lan Kampung Wonorejo. Ing Kampung Jetis ana kenya sulistya sesilih Roro Denok. Dene ing Kampung Wonorejo ana priya kang sekti mandraguna asesilih Joko Tua.

Ing sawijining dina Joko Tua mbebedhag, mlaku saka kampung siji tumuju kampung liyane, nganti tekan ing Kampung Jetis. Joko Tua lan pengawale kentekan wedang. Nalika arep njaluk wedang dumadakan Joko Tua weruh Roro Denok kang lagi mepe klambi. Saknalika Joko Tua rumangsa kepranan marang kasulistyane Roro Denok.

Dina sakbanjure Joko Tua nglamar Roro Denok. Roro Denok bingung amarga ora tresna, nanging ugo wedi karo kesektene Joko Tua. Roro Denok ngajokake syarat kang abot kanggo nolak kanthi alus. Dheweke pengin digawekake perahu kang kuat ing wektu sewengi, diisi mas-masan lan rajakaya kanggo mas kawine.

Sakwise wengi, Joko Tua njaluk bantuan para jin kanggo gawe prau. Ora nganti suwe, prau wis meh dadi. Roro Denok bingung, nanging dheweke golek akal kanggo ngusir jin-jin kang mbiyantu Joko Tua. Roro Denok njaluk tulung tangga-tanggane supaya nuthuki lumpang, saengga pitik-pitik jago padha kluruk. Krungu jago padha kluruk, para jin gage-gage lunga amarga dikira uwis esuk.

Joko Tua nesu banget amarga ngerti menawa disrekal dening Roro Denok. Prau kang wis meh dadi kui ditendang lan saknalika mbalik dadi watu kang sakbanjure katelah Watu Prau.

Akhire Joko Tua lunga saka Kampung Jetis kanthi nyepatani menawa kabeh keturunane Roro Denok bakal dadi perawan tua.